Johan Manzambi vazhdon të jetë një nga zbulimet më të mëdha të këtij Botërori. Vetëm 20 vjeç, futbollisti i Zvicrës dhuroi një tjetër paraqitje vendimtare, duke udhëhequr skuadrën drejt fitores ndaj Algjerisë në raundin e parë me eliminim direkt.
Zvicra e kontrolloi ndeshjen me qetësi dhe arriti të zhbllokonte rezultatin falë një aksioni fantastik individual të Manzambit. Talenti zviceran shpërtheu me forcë dhe teknikë nga krahu, arriti deri në fundore dhe shërbeu për Embolon, i cili nuk gaboi para portës.
Ky moment ndryshoi gjithë rrjedhën e ndeshjes. Algjeria, që deri në atë moment kishte tentuar të krijonte rrezik me qarkullim të shpejtë të topit, nuk arriti më të reagonte siç duhet.
Në fillimin e pjesës së dytë, Zvicra goditi sërish. Ndoye realizoi golin e sigurisë pas një aksioni ku mbrojtja algjeriane u tregua pasive dhe nuk arriti të largonte rrezikun.
Manzambi ishte sërish protagonisti i madh. Me tre gola dhe dy asiste në katër ndeshje të Botërorit, ai po konfirmohet si një nga lojtarët më të rrezikshëm të turneut dhe një armë vendimtare për Zvicrën.
Në krahun tjetër, Algjeria nuk gjeti zgjidhje as nga fusha dhe as nga stoli. Problemet në mbrojtje dhe mungesa e qartësisë në sulm bënë që skuadra afrikane të largohej nga Botërori pa mundur të ndryshonte fatin e ndeshjes.
Zvicra, ndërkohë, vazhdon rrugëtimin mes 16 më të mirave dhe tani pret të mësojë kundërshtarin e radhës, që do të dalë nga përballja mes Kolumbisë dhe Ganës.
