Viktor Gyokeres duket se do të jetë përforcimi i parë i madh Manchester United në merkaton e ardhshme verore. Që pas transferimit në verën e vitit 2023 te Sporting Lisbon, suedezi ka shkëlqyer me perfomancat e tij, duke ngjallur interesin e shumë klubeve të mëdha në kampionatet elitare në Europë.
Pavarësisht garës së fortë, Manchester United duket se ia ka dalë për të bindur suedezin të vijë te “Djajtë e Kuq”, ku tashmë dihet nga të gjithë marrëdhënia shumë e mirë që ai ka me trajnerin Ruben Amorim.
Edhe pse se ka lojtarë si Rasmus Hojlund dhe Joshua Zirkzee, Manchester United ka vuajtur shumë këtë sezon për të pasur qëndrueshmëri në sulm. Mungesa e përforcimeve në afatin kalimtar të janarit solli kritika të shumta, veçanërisht pas largimit të Antony dhe paqartësive rreth të ardhmes së Marcus Rashford. Megjithatë, bordi zgjodhi të mos bënte lëvizje të mëdha në janar, duke marrë parasysh ardhjen e afërt të Gyokeres në merkaton e verës.
Sulmuesi suedez ka një klauzolë lirimi prej 100 milionë eurosh, por sipas Fichajes, Sporting ka treguar gatishmëri për të negociuar një shifër rreth 70-75 milionë euro për të lejuar largimin e suedezit, i cili deri tani ka shënuar 34 gola në të gjitha garat për këtë sezon.
