Manchester United fitoi 2-0 ndaj Tottenham në Old Trafford dhe regjistroi fitoren e katërt radhazi nën drejtimin e Michael Carrick. Bryan Mbeumo zhbllokoi sfidën në minutën e 38-të pas një skeme të punuar nga goditja e këndit, ndërsa Bruno Fernandes vulosi suksesin në minutën e 81-të pas krosimit të Diogo Dalot.
Momenti vendimtar ishte kartoni i kuq i Cristian Romero në minutën e 29-të. Kapiteni i Spurs u ndëshkua për një ndërhyrje të rrezikshme ndaj Casemiros, duke lënë ekipin me 10 lojtarë për pjesën më të madhe të ndeshjes. Ky ishte kartoni i dytë i kuq i sezonit për Romero dhe do ta mbajë jashtë për katër ndeshje, përfshirë derbin e Londrës së Veriut ndaj Arsenal më 22 shkurt.
Humbja e thellon krizën e Tottenham: tashmë 7 ndeshje radhazi pa fitore në Premier League, me vetëm 4 pikë në këtë seri dhe pozicionim që i afron me zonën e rrezikut. Në anën tjetër, United konsolidohet në zonën e Top 4, ndërsa tifozët vazhdojnë të këndojnë në mbështetje të Carrick pas një tjetër paraqitjeje të pjekur dhe të kontrolluar.
