Manchester United ka marrë një fitore të rëndësishme 3-1 ndaj Aston Villas në javën e 30-të të Premier League, në një ndeshje ku protagonist absolut ishte kapiteni Bruno Fernandes, i cili jo vetëm udhëhoqi skuadrën drejt suksesit, por hyri edhe në historinë e klubit me një rekord të ri.
Pjesa e parë u mbyll pa gola, edhe pse sfida ishte e luftuar dhe me ritëm të lartë. Aston Villa mori kartonin e parë të verdhë në minutën e 41-të me Ollie Watkins, ndërsa gjithçka mbeti e hapur për 45 minutat e dyta.
Manchester United zhbllokoi rezultatin në minutën e 53-të me Casemiron, i cili finalizoi saktë pas asistit të Bruno Fernandes. Miqtë reaguan dhe arritën të barazonin në minutën e 64-t me Ross Barkley, duke rikthyer ekuilibrin në takim.
Megjithatë, përgjigjja e skuadrës së “Djajve të Kuq” ishte e menjëhershme. Vetëm shtatë minuta më pas, në minutën e 71-të, Matheus Cunha riktheu avantazhin për vendasit, sërish pas një asisti të Bruno Fernandes, që po diktonte ritmin e lojës në çdo aksion vendimtar.
Goli që vulosi përfundimisht fitoren erdhi në minutën e 81-të, kur Benjamin Sesko realizoi për 3-1, duke i dhënë fund çdo shprese të Aston Villas për të dalë me pikë nga kjo transfertë.
Përtej tri pikëve të rëndësishme në garën për një vend në Champions League, mbrëmja ishte speciale edhe për Bruno Fernandes në planin personal. Mesfushori portugez regjistroi dy asistime dhe arriti në kuotën e 16 asistimeve në Premier League këtë sezon, duke vendosur një rekord të ri për Manchester United.
Me këtë shifër, Fernandes ka lënë pas legjendën David Beckham, i cili kishte regjistruar 15 asistime me fanellën e United në sezonin 1999/2000 të kampionatit anglez.
Në një mbrëmje ku Manchester United tregoi forcë, reagim dhe cilësi në momentet kyçe, Bruno Fernandes konfirmoi edhe një herë statusin e tij si lideri teknik i skuadrës dhe një nga organizatorët më vendimtarë të Premier League.
