Olympique Lyonnais dëshiron ta mbajë Endrick “me çdo kusht” edhe për më gjatë, pas nisjes së shkëlqyer të brazilianit në Francë. Sulmuesi u huazua nga Real Madridi gjatë merkatos së dimrit dhe menjëherë ka filluar të bëjë diferencën me paraqitje mbresëlënëse.
Sipas ESPN Brasil, Lyon po punon për zgjatjen e huazimit të Endrick. Trajneri Paulo Fonseca thuhet se po i bën presion drejtuesve që të bëjnë gjithçka të mundur për ta mbajtur lojtarin në ekip për një periudhë më të gjatë.
Deri tani, Endrick ka luajtur 3 ndeshje me Lyon, duke shënuar 4 gola dhe duke dhënë 1 asist. Në ndeshjen e fundit ai realizoi hat-trick dhe ndihmoi skuadrën të fitonte 5–2, duke e rritur edhe më shumë entuziazmin rreth tij.
Më herët është raportuar se marrëveshja e huazimit mes klubeve është e vlefshme deri në qershor 2026, me Lyon që mbulon 50% të pagës së lojtarit. Po ashtu, theksohet se Lyon nuk ka opsion blerjeje, çka do të thotë se Endrick do të duhet të kthehet te Real Madridi sapo të përfundojë periudha e huazimit.
