Irani mbështet çdo vendim të marrë nga Libani në bisedimet për të siguruar një armëpushim me Izraelin, tha të premten një zyrtar i lartë iranian, aleat i Hezbollahut, duke sinjalizuar se Teherani dëshiron të shohë fundin e një konflikti që i ka dhënë goditje të rënda libanezëve të tij.
Izraeli nisi sulme ajrore në periferitë jugore të Bejrutit të kontrolluara nga Hezbollahu, duke rrafshuar ndërtesat për të katërtën ditë radhazi. Izraeli ka rritur bombardimin e zonës këtë javë, një përshkallëzim që ka përkuar me shenjat e lëvizjes në diplomacinë e udhëhequr nga SHBA drejt një armëpushimi.
Pas ditëve të tëra sulmesh intensive në kryeqytet, bombardimet izraelite rrafshuan pesë ndërtesa në periferitë jugore të Bejrutit të njohura si Dahiyeh të premten, duke përfshirë një pranë një prej nyjeve më të ngarkuara të trafikut të Bejrutit, Tayouneh.
Ushtria izraelite tha se sulmet ushtarake kishin si synim depot e municioneve dhe infrastrukturat e Hezbollahut. Izraelitët lëshuan paralajmërime në mediat sociale për civilët në mënyrë që të evakuoheshin nga zona.
Dy burime të larta politike libaneze i thanë Reuters se ambasadori i SHBA në Liban i kishte paraqitur një propozim armëpushimi kryetarit të parlamentit të Libanit Nabih Berri të enjten. Berri mbështetet nga Hezbollahu për të negociuar dhe u takua të premten me zyrtarin e lartë iranian Ali Larijani.
I pyetur në një konferencë shtypi nëse ai kishte ardhur në Bejrut për të minuar planin e armëpushimit të SHBA-së, Larijani tha: “Ne nuk po kërkojmë të sabotojmë asgjë. Ne jemi në kërkim të një zgjidhjeje të problemeve. Ne mbështesim në të gjitha rrethanat qeverinë libaneze. Ata që po përçajnë janë Netanyahu dhe njerëzit e tij.“
