A do ta kishit imagjinuar ndonjëherë që lopët të mbanin syze realiteti virtual? Kjo po ndodh realisht në disa ferma në Rusi dhe Turqi, ku fermerët kanë nisur të testojnë pajisje VR të përshtatura posaçërisht për bagëtitë.
Sipas raportimeve, lopëve u vendosen kufje dhe syze speciale që u shfaqin fusha të gjelbra verore, me qëllim që të krijojnë një ambient më të qetë dhe relaksues gjatë muajve të ftohtë të dimrit. Teknologjia është përshtatur edhe me mënyrën se si shohin vetë lopët, duke përdorur ngjyra të kalibruara sipas shikimit të tyre.
Ekspertët besojnë se një ambient më i qetë ndikon drejtpërdrejt në uljen e stresit tek kafshët, gjë që mund të përmirësojë edhe cilësinë dhe sasinë e qumështit. Testet e para kanë treguar se lopët kanë qenë më të qeta dhe prodhimi i qumështit ka pësuar rritje.
Ideja mund të duket si një skenë nga filmat fantastiko-shkencorë, por fermerët po e konsiderojnë si një mënyrë moderne për të përmirësuar mirëqenien e kafshëve dhe efikasitetin në fermë.
