Harry Kane po kalon sezonin më të mirë të karrierës së tij dhe ish-bashkëlojtari Fernando Llorente beson se sulmuesi i Bayern Munich do të ishte përshtatja ideale për çdo klub të madh në botë, përfshirë edhe Real Madridin.
Kapiteni i Anglisë po shkëlqen në Gjermani nën drejtimin e Vincent Kompany, duke regjistruar plot 50 gola dhe 6 asistime në 42 ndeshje në të gjitha kompeticionet. Me këtë formë të jashtëzakonshme, emri i tij ka nisur sërish të lidhet me klubet më të mëdha europiane.
Duke folur për Hajper, Llorente, që ka luajtur me Kane te Tottenham, u shpreh se anglezi do të ishte zëvendësuesi perfekt për çdo sulmues në çdo ekip.
“Ai do të ishte zëvendësuesi perfekt për çdo sulmues, në çdo skuadër në botë. Kur isha te Tottenham, flitej shumë për Real Madridin dhe unë thoja se ai do të ishte perfekt, jo vetëm për Madridin, por për çdo ekip. Është një lojtar që i bën të gjitha shumë mirë”, deklaroi Llorente.
Ish-sulmuesi i Juventus dhe Athletic Bilbao vlerësoi jo vetëm cilësitë teknike të Kane, por edhe profesionalizmin e tij, duke kujtuar se anglezi ka kaluar edhe periudha të vështira për shkak të dëmtimeve.
“Është një lojtar skuadre, një profesionist i vërtetë. I ka të gjitha. E vetmja keqardhje është se po rritet në moshë dhe ka më pak vite për të luajtur. Ka pasur edhe disa dëmtime, më kujtohet se te Tottenham kishte shpesh probleme me kaviljen që e ngadalësonin, por ai vazhdon të jetë aty, duke shënuar gola si gjithmonë. Kjo nuk do t’i largohet kurrë dhe ai mund të jetë më i miri në çdo skuadër në botë”, shtoi ai.
Ndërkohë, Bayern Munich vazhdon të presë një vendim për rinovimin e kontratës së sulmuesit, ndërsa Kane mbetet i fokusuar te objektivat me klubin bavarez dhe te përpjekja për të fituar më në fund trofetë e mëdhenj që i kanë munguar deri tani në karrierë.
