Mohamed Salah pritet të luajë sërish për Liverpool para përfundimit të sezonit, pas frikës fillestare për një dëmtim më serioz.
Sulmuesi egjiptian u zëvendësua në minutën e 59-të të fitores 3-1 ndaj Crystal Palace të shtunën në “Anfield”, për shkak të një problemi muskulor në pjesën e pasme të kofshës.
Megjithatë, Liverpool ka konfirmuar përmes një komunikate zyrtare se dëmtimi nuk është serioz dhe se Salah pritet të jetë në dispozicion para mbylljes së këtij sezoni.
“Liverpool FC mund të konfirmojë se Mohamed Salah pritet të jetë i gatshëm të luajë sërish para fundit të këtij sezoni”, thuhet në njoftimin e klubit.
Lajmi është një lehtësim i madh për Liverpool, që do të ketë mundësi ta shohë sërish në fushë një nga lojtarët më të rëndësishëm të skuadrës para mbylljes së kampionatit.
