Tre pengjet e para të mbajtura nga Hamasi u liruan pak pas orës 16:00 të dielën. Lajmi për lirimin e tre pengjeve u konfirmua nga IDF, ndërsa një zyrtar izraelit i tha Reuters se Kryqi i Kuq e kishte informuar Izraelin se pengjet ishin në gjendje të mirë shëndetësore.Tre pengjet e para të liruara sot janë 24-vjeçarja Romy Gonen, 28-vjeçarja Emily Damari dhe 31-vjeçari Doron Steinbrecher. Të tre gratë u morën peng më 7 tetor 2023, gjatë ofensivës së Hamasit që vrau rreth 1200 njerëz dhe rrëmbyen 251 në Gaza.
Romy Gonen u rrëmbye nga festivali i muzikës Supernova më 7 tetor 2023, ndërsa Emily Damari (gjysmë britanike) dhe Doron Steinbreche, një asistent veterinar, u rrëmbyen nga shtëpitë e tyre në kibutin izraelit Kfar Aza.Pak pas orës 16:00, një zëdhënës i Hamasit i tha Reuters se procesi i dorëzimit të pengjeve ishte në vazhdim. Megjithatë, disa minuta më vonë IDF raportoi se Kryqi i Kuq informoi ushtrinë se pengjet u ishin dorëzuar atyre dhe se ata po i çonin ato brenda Rripit të Gazës.
Mediat lokale konfirmuan se tre gratë u morën nga një autokolonë e Kryqit të Kuq për t’ia dorëzuar forcave izraelite që do t’i çojnë në kufirin me Gazën ku i presin prindërit e tyre. Prej aty do t’i shoqërojnë për në spital.
Më parë, pamjet televizive treguan një turmë të madhe që mblidhej pranë automjeteve të Kryqit të Kuq në sheshin Saraya në qytetin qendror të Gazës, ku me sa duket u bë dorëzimi. Mes tyre ishin dhjetëra persona të armatosur të Hamasit.
