Gjykata e Posaçme ka lënë në burg ish-shefat e krimeve, Shkëlzen Ruskën dhe Ervis Alisinanaj. Një i tretë është në kërkim, ndërkohë që në pranga, ka përfunduar dhe një ish punonjës policie. Të gjithë dyshohen të kenë bashkëpunuar me dy organizata kriminale, të cilat merreshin me kultivimin dhe trafikun e lëndëve narkotike në jug të vendit.
Shkëlzen Ruska ka qenë shef i Krimeve në Himarë, Ervis Alisinanaj, shef i Krimeve në Komisariatin e Lushnjës, Elvis Dervishin, shef i Komisariatit të Policisë Kufitare në Sarandë dhe Erdit Hazizaj, ish punonjës i policisë, i cili ka qenë pjesë dhe e Forcës Operacionale në Drejtorinë e Përgjithshme të Shtetit.
Hetimet e nisura që në vitin 2022 kanë patur në fokus veprimtarinë e grupit, i cili realizonte kultivimin dhe trafikimin e marijuanës drejt Greqisë, Në krye të tij, dyshohet se qëndronte Kristi Qirici.
Sipas Prokurorisë, ky grup është përfshirë në rastin e “trafikimit për në Greqi, në mars të vitit 2020, përmes pikës së kalimit kufitar, “Qafë Botë”, të një sasie prej 1144.9 kg cannabis sativa të papërpunuar, 4.068 kg cannabis të përpunuar (çokollatë) dhe 0.916 kg cannabis i përpunuar (vaj), me vlerë rreth 1.700.000 euro, sasi kjo që u është sekuestruar dy shtetasve italianë të dënuar në Greqi”. Policët u hapnin doganën dhe mbyllnin sytë për kontrollet për drogën.
Në një rast në dosjen e SPAK, ku janë administruar jo vetëm biseda në të cilat një trafikant tregon i shqetësuar “se kam investuar 250 dhe do fitoj 650 mijë euro” dhe sipas tij po humbiste shumë, “megjithëse lidhjet i kam me shtet”.
