Të maskuar dhe nën kërcënimin e një sendi të ngjashëm me armë zjarri, dy persona vodhën me dhunë lekët e xhiros ditore në një karburant në Librazhd. Falë reagimit të menjëhershëm të strukturave të Drejtorisë Vendore të Policisë Elbasan, në bashkëpunim me Komisariatin e Policisë Librazhd, autorët u identifikuan, u kapën dhe u arrestuan menjëherë pas ngjarjes.
Gjatë kontrollit u sekuestruan sendi që u përdor për kanosjen, maskat dhe veshjet që autorët mbajnë gjatë krimit, paratë e vjedhura, automjeti me targa të mbuluara që përdorën si dhe celularët në përdorim nga shtetasit.
Menjëherë pas njoftimit për vjedhjen me dhunë, Seksioni për Hetimin e Krimeve ndaj Pasurisë, në bashkëpunim me Sektorin për Hetimin e Krimeve të Rënda, Komisariatin e Policisë Librazhd dhe Forcën e Posaçme “Shqiponja”, organizuan operacionin policor të koduar “Hijet”.
Si rezultat i këtij operacioni, pak minuta pas ngjarjes, u identifikuan dhe u vunë në pranga dy autorët e dyshuar: shtetasit D. I., 23 vjeç, dhe D. S., 19 vjeç, të dy banues në Elbasan.
Sipas hetimeve, më datë 15.09.2025, rreth orës 23:00, dy të rinjtë, duke qarkulluar me një automjet me targa të mbuluara, kanë shkuar në karburantin në hyrje të Librazhdit. Të maskuar dhe me një send të ngjashëm me armë pistoletë, ata kanë kanosur punonjësin, i kanë marrë xhiron ditore dhe janë larguar me shpejtësi.
Pasi u larguan nga vendngjarja, për të fshehur provat, ata hodhën në shkurret e fshatit Mirakë sendin e përdorur për kanosjen, maskat dhe veshjet.
Gjatë operacionit, policia gjeti dhe sekuestronte këto sende si prova materiale, së bashku me paratë e vjedhura, celularët dhe automjetin e autorëve.
Materialet iu referuan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprat penale “Vjedhje me armë”, kryer në bashkëpunim, dhe “Mbajtja pa leje dhe prodhimi i armëve, armëve shpërthyese dhe municionit”.
