TikTok po përgatitet të lançojë një aplikacion të pavarur për përdoruesit amerikanë, i cili pritet të funksionojë me një algoritëm dhe sistem të dhënash të ndara nga aplikacioni global. Kjo do të krijonte terrenin për një shitje të mundshme të ndërmjetësuar nga presidenti amerikan, Donald Trump, sipas burimeve të njohura me këtë çështje, raporton Reuters.
Gjatë muajve të fundit, punonjësit e TikTok kanë punuar me afate të shkurtra për të ndërtuar një version specifik për SHBA-të, duke transferuar dhe kopjuar bazën e kodit të aplikacionit global. Aty përfshihen edhe modelet e inteligjencës artificiale, algoritmet, funksionet dhe të dhënat e përdoruesve, thanë për Reuters disa punonjës aktualë të kompanisë, që kërkuan të mbeten anonimë.
Ky hap mund të zgjidhë debatet shumëvjeçare mbi ndarjen e asaj që konsiderohet si “pasuria më e çmuar” e TikTok: algoritmi i rekomandimeve. Ky algoritëm ka qenë në qendër të përplasjes teknologjike mes SHBA-ve dhe Kinës. ByteDance dhe TikTok nuk kanë komentuar mbi këtë çështje.
Iniciativa, e njohur brenda kompanisë si “M2”, ka afat shtatorin dhe mund të përfaqësojë ndarjen më të madhe teknike mes operacioneve amerikane dhe atyre globale të TikTok. Ndryshimi do të ndikojë mënyrën se si 170 milionë përdorues amerikanë konsumojnë përmbajtje globale dhe se si krijuesit jo-amerikanë përfitojnë nga platforma.
Aplikacioni i ri amerikan pritet të funksionojë në mënyrë të pavarur, i ngjashëm me Douyin, versioni i TikTok që është në dispozicion vetëm në Kinë. Burimet thonë se përdoruesit jashtë SHBA-ve nuk do të mund ta gjejnë këtë version në dyqanet e aplikacioneve.
Ndërsa përmbajtja ekzistuese pritet të transferohet në aplikacionin e ri, ende nuk është e qartë nëse dhe në çfarë mase përmbajtja globale do të integrohet në versionin amerikan. Aplikacioni do të përdorë vetëm të dhënat e përdoruesve amerikanë për të trajnuar algoritmin e rekomandimeve, çka do ta distancojë më tej nga sistemi global i TikTok. Si rezultat, shumica e përmbajtjes së sugjeruar do të vijë nga krijues amerikanë.
SHKËPUTJA NGA GLOBALE
Përpjekja për të ndarë aplikacionin amerikan nga platforma globale ka nisur prej muajsh. Drejtuesit e ByteDance kanë përgatitur plane të ndryshme për të shmangur një ndalim të aplikacionit në SHBA, sipas legjislacionit të miratuar së fundmi për sigurinë e të dhënave.
E ardhmja e aplikacionit, i cili përdoret nga gati gjysma e amerikanëve, është lënë pezull pas një ligji të vitit 2024 që kërkonte nga ByteDance të shiste TikTok deri më 19 janar. Zyrtarët amerikanë kanë argumentuar se pronësia kineze e TikTok mund ta bëjë atë të ndjeshëm ndaj ndikimit të qeverisë së Pekinit për qëllime propagandistike dhe spiunazhi.
Pas afatit të parë dhe një ndërprerjeje të përkohshme të shërbimit në janar, TikTok filloi të zhvendosë të dhënat e përdoruesve jo-amerikanë jashtë qendrave të të dhënave në SHBA, të menaxhuara nga Oracle, duke siguruar që vetëm të dhënat e përdoruesve amerikanë të ruhen në SHBA.
Kompania ka nisur gjithashtu ndarjen e kodit të algoritmit të saj kryesor që nga viti i kaluar, lëvizje kjo që ishte raportuar më parë nga Reuters dhe ishte mohuar nga kompania në atë kohë.
Pasi të përfundojë ndarja, zhvillimi dhe menaxhimi i teknologjisë thelbësore do të bëhet në mënyrë të pavarur nga ekipi global i TikTok, ndonëse disa punonjës të ByteDance mund të vazhdojnë të mbështesin TikTok-un e SHBA-ve në mënyrë të jashtme (outsourcing).
Kjo ka ngjallur shqetësime të brendshme mbi faktin nëse algoritmi i versionit amerikan do të vazhdojë të jetë po aq efektiv pa mbështetjen e talentit inxhinerik global të ByteDance.
NEGOCIATAT DHE PRESIONI POLITIK
Ky projekt po zhvillohet në një kohë kur ByteDance përballet me presion të vazhdueshëm nga Uashingtoni për të shitur operacionet amerikane të TikTok. Një marrëveshje për ndarjen e biznesit ishte drejt finalizimit këtë pranverë, por u pezullua pasi Kina sinjalizoi se nuk do të e miratonte pas njoftimeve të Trump për tarifa të reja ndaj mallrave kineze.
Nëse marrëveshja miratohet, aplikacioni i ri pritet të zotërohet nga një sipërmarrje e përbashkët mes një konsorciumi amerikan investitorësh dhe ByteDance, që do të mbajë një pjesë minoritare.
Megjithatë, nuk dihet nëse Pekini ka dhënë dritën jeshile për kopjimin e algoritmit apo për shitjen e operacioneve në SHBA.
Në të kaluarën, autoritetet kineze kanë treguar kundërshtim ndaj eksportimit të algoritmit të TikTok, duke e konsideruar atë një pasuri strategjike dhe një burim të popullaritetit global të platformës. Në vitin 2020, kur administrata Trump kërkoi për herë të parë shitjen e TikTok në SHBA, Kina ndryshoi rregullat e kontrollit të eksportit për të përfshirë teknologji si algoritmet e rekomandimeve.
Në atë kohë, drejtuesit e TikTok e refuzuan idenë e ndarjes së operacioneve amerikane, duke e konsideruar të dëmshme për përdoruesit dhe rrjetin global.
Sot, fatet e TikTok janë gjithashtu pjesë e negociatave më të gjera tregtare mes Trump dhe Kinës për tarifat. Trump tha javën e kaluar se do të riniste bisedimet me Pekinin për një marrëveshje mbi TikTok. Edhe pse u shpreh se nuk ishte “shumë i sigurt” për miratimin e Kinës, ai shtoi se beson “se kjo marrëveshje është e mirë për Kinën dhe për ne”.
