Aktori dhe regjisori i njohur amerikan, Robert Redford, ka ndërruar jetë në moshën 89-vjeçare. Sipas The New York Times, ai vdiq në gjumë në banesën e tij malore pranë Provo-s, në Utah, mëngjesin e së martës, më 16 shtator. Shkaku i vdekjes nuk është bërë i ditur.
Redford ishte një prej ikonave më të mëdha të Hollivudit, i njohur për rolet e tij në filma klasike si Butch Cassidy and the Sundance Kid (1969) dhe Out of Africa (1985). Gjatë karrierës së tij të gjatë, ai fitoi çmime të shumta, përfshirë një Oscar për regjisorin më të mirë për filmin Ordinary People (1980), si dhe një Oscar nderi në vitin 2002 për kontributin e tij në kinematografi.
“E kam kaluar shumicën e jetës duke parë përpara, jo pas. Por sonte, ndërsa shoh në pasqyrën e pasme, kuptoj se pas meje ndodhet një gjë që s’e kam menduar shpesh: historia,” u shpreh ai në fjalimin e tij të pranimit të çmimit Oscar.
Një karrierë brilante, e shoqëruar nga sfida personale
Lindur më 18 gusht 1936 në Santa Monica, Kaliforni, Redford nisi karrierën e tij si aktor teatri në Broadway në fundin e viteve 1950, përpara se të kalonte me sukses në ekranin e madh. Ai shkëlqeu në filmat The Sting (1973), The Great Gatsby (1974), All the President’s Men (1976), The Natural (1984), Indecent Proposal (1993) dhe The Horse Whisperer (1998), ndër të tjerë.
Përveçse aktor, Redford ishte një regjisor i suksesshëm, duke sjellë në ekran filma si A River Runs Through It (1992), Quiz Show (1994) dhe The Legend of Bagger Vance (2000).
Në vitin 2018, ai njoftoi tërheqjen nga aktrimi pas filmit The Old Man & the Gun, por më vonë u pendua që kishte deklaruar publikisht largimin, duke theksuar se “nuk i dihet kurrë” së çfarë sjell e ardhmja. Në vitin 2025, ai u shfaq me një rol të shkurtër në serialin Dark Winds, rikthimi i tij i parë në ekran pas 6 vitesh.
