Presidenti i Barcelonës, Joan Laporta, ka komentuar në RAC-1 gjestin e Kylian Mbappé, i cili pas humbjes së Real Madridit ndaj Barcelonës në finalen e Superkupës (3-2) u pa duke i ftuar shokët e ekipit të largoheshin nga fusha drejt dhomave të zhveshjes menjëherë pasi mori medaljen e vendit të dytë.
Mbappé luajti në finale pavarësisht problemeve me gjurin, por nuk arriti ta shmangte disfatën në ndeshjen e parë vendimtare të sezonit. Pas ndeshjes, veprimi i tij u konsiderua i debatueshëm, pasi u interpretua si mungesë respekti në momentin e ceremonisë.
Laporta e kritikoi hapur këtë sjellje:
“Më habit ajo që bëri. Në fitore dhe në humbje duhet të jesh bujar dhe i respektueshëm. Ky është sport dhe duhet të sillesh normalisht. Mendoj se ne në fitoren tonë u treguam bujarë dhe të respektueshëm me kundërshtarin. Prandaj nuk e kuptoj,” u shpreh ai.
Presidenti i Barcelonës konfirmoi gjithashtu se pas Clásico-s së parë të sezonit në kampionat (ku kishte fituar Reali në “Bernabéu”), mes dy skuadrave ka pasur tension dhe nervozizëm:
“Që nga ndeshja e ligës kishte një ndryshim qëndrimi dhe lojtarët ishin pak të acaruar. Është e kuptueshme. Sinqerisht, unë nuk e pashë reagimin e Mbappé në fushë, por e imagjinoj që ka qenë një moment shumë i vështirë. Duhet të kenë qenë shumë të mërzitur dhe prandaj reaguan ashtu,” tha Laporta.
Në fund, Laporta la të kuptohet se gjesti mund të ketë ardhur nga frustrimi i humbjes dhe nga fakti që Reali e kishte nënvlerësuar shansin e Barcelonës:
“Ata e mendonin se ne kishim më shumë shanse për ta fituar këtë ndeshje, por e panë vetë në fushë… dhe kjo është e rëndë. E sheh çfarë ndodh…”
