Kreu i Lëvizjes “Shqipëria Bëhet”, Adriatik Lapaj, ka deklaruar se forca politike që ai përfaqëson mund të shkrihet në një parti të vetme me “Nisma Thurje”, me të cilën ka bashkëpunuar në zgjedhjet e fundit.
Në një intervistë për A2 CNN, Lapaj tha se është duke negociuar me drejtuesit e “Nisma Thurje”, Endri Shabani dhe Panajot Soko, për të gjetur formatin e duhur të bashkimit.
“Partia Nisma Thurje është një parti me një anë. Ne jemi Lëvizja ‘Shqipëria Bëhet’, që është parti me një anë. Kemi bashkëpunuar për koalicionin parazgjedhor,” tha ai.
Sipas Lapajt, përfundimi i këtij procesi do të sjellë rinegociim të rrugëtimit të përbashkët.
“Para zgjedhjeve ka pasur një qasje që mund të ndodhë një kohezion, edhe të shkrihemi në një. Ngelet për t’u diskutuar. Unë jam i hapur për të gjitha variantet, por mund të ndodhë. Ne e shohim të mirëseardhur çdo bashkim që sjell vlera dhe ne mendojmë që sjellim vlera,” u shpreh ai.
