Lamine Yamal, ylli 17-vjeçar i Barcelonës dhe kombëtares spanjolle, ka vendosur të agjërojë gjatë muajit të Ramazanit, duke u bërë lojtari i parë në historinë e ekipit kombëtar të Spanjës që ndjek këtë praktikë fetare gjatë angazhimeve ndërkombëtare. Pavarësisht kërkesave të larta fizike të futbollit profesionist, Yamal ka zgjedhur të respektojë traditat myslimane të familjes së tij.
Rutina e tij gjatë këtij muaji është e organizuar me kujdes për të balancuar agjërimin me stërvitjet dhe ndeshjet. Ai zgjohet herët në mëngjes për të konsumuar syfyrin, një vakt që përfshin një tabletë elektrolitesh për të shmangur dehidratimin gjatë ditës. Pjesën më të madhe të kohës e kalon mes stërvitjeve, pushimit në dhomën e tij dhe lutjeve, duke pritur momentin e iftarit pas perëndimit të diellit.
Vendimi i Yamal për të agjëruar, edhe në periudha kaq të rëndësishme për karrierën e tij, ka ngjallur respekt dhe admirimin e tifozëve dhe komunitetit sportiv. Marca shkruan se stafi mjekësor dhe trajnerët e Barcelonës dhe Spanjës po e monitorojnë nga afër për t’u siguruar që ai të mbajë një formë të mirë fizike gjatë kësaj periudhe.
Në një intervistë për AS, shoku i tij i skuadrës, Jules Koundé, ka theksuar përkushtimin dhe disiplinën e Yamal, duke thënë se ai është një shembull i jashtëzakonshëm për të gjithë të rinjtë që duan të ndjekin ëndrrat e tyre pa bërë kompromis me vlerat personale.
Vendosmëria e Lamine Yamal për të qëndruar besnik ndaj fesë së tij, ndërsa luan në nivelet më të larta të futbollit evropian, është një mesazh i fuqishëm për diversitetin dhe tolerancën në sport.
Ky akt i tij tregon se vlerat dhe besimi mund të bashkëjetojnë me sukses në arenën sportive më të madhe të botës.
