Lamine Yamal pritet të jetë gati për debutimin e Spanjës në Kupën e Botës ndaj Kepit të Gjelbër. Ylli i Barcelonës kishte ngritur shqetësime pas dëmtimit muskulor të pësuar në ndeshjen ndaj Celta Vigo, por tashmë duket se ka lënë pas problemet fizike.
Sipas gazetarit Javier Herráez, Lamine është rikuperuar dhe pritet të jetë pjesë e formacionit titullar të Luis de la Fuente. Vetë lojtari kishte pranuar më herët se ishte frikësuar se mund të humbiste Botërorin, por puna intensive gjatë javëve të fundit e ka ndihmuar të rikthehet në kohë.
Trajneri spanjoll duket se ka një ide të qartë për formacionin e ndeshjes së parë. Unai Simón pritet të jetë në portë, ndërsa në mbrojtje mund të luajnë Marcos Llorente, Laporte, Cubarsí dhe Cucurella.
Në mesfushë, dilema kryesore mbetet mes Rodri dhe Zubimendi, por Rodri shihet si favorit për të nisur nga minuta e parë. Ai pritet të shoqërohet nga Pedri dhe Fabián Ruiz.
Në sulm, De la Fuente pritet të mbështetet te Lamine Yamal, Oyarzabal dhe Nico Williams. Megjithatë, gjendja e Nico mbetet shqetësimi kryesor, pasi sipas Herráez, ai është lojtari që aktualisht ndodhet në formën më të dobët fizike.
Nëse Nico nuk arrin të rikuperohet plotësisht, alternativa të mundshme për formacionin janë Ferran Torres ose Víctor Muñoz.
