Philipp Lahm ka kritikuar ashpër presidentin e FIFA-s, Gianni Infantino, duke e akuzuar se po dëmton besueshmërinë e futbollit dhe të Kupës së Botës.
Ish-kapiteni i Gjermanisë, kampion bote në vitin 2014, ka shprehur shqetësimin për afërsinë e Infantinos me figura të fuqishme politike, përfshirë Donald Trump. Në një shkrim për Die Zeit, Lahm deklaroi se krijohet përshtypja se drejtuesit po përfitojnë personalisht nga pozicionet e tyre.
“Ajo që ngjall më shumë dyshime është afërsia me figura të fuqishme si Donald Trump. Kupa e Botës është shitur. Kjo dëmton besueshmërinë e futbollit”, shkroi Lahm.
Ish-mbrojtësi gjerman kritikoi gjithashtu çmimet e biletave, duke akuzuar FIFA-n për mungesë transparence mbi kërkesën reale. Ai foli edhe për ngarkesën e shtuar ndaj lojtarëve, sidomos me formatin e ri të Botërorit të Klubeve.
Megjithatë, Lahm mbështet zgjerimin e Kupës së Botës në 48 skuadra, duke theksuar se zhvillimi i futbollit në të gjithë botën është përgjegjësi e FIFA-s.
