Personi që shihni në foto është Arianit Kurti, 23-vjeçari që mbeti i vdekur gjatë orëve të para të mëngjesit të kësaj të mërkure brenda ambienteve të një lokali në Manëz.
Ngjarja e rëndë u shënua rreth orës 01:45, brenda ambienteve të një lokali në Manëz, në afërsi të një pike karburanti. Viktimë mbetën Aranit Kurti dhe Flori Paluçi, ndërkohë në kërkim është shpallur Daniel Pepa.
Siç raportuam dhe më herët, tragjedia erdhi pas një sherri për motive banale. Aranit Kurti bashkë me Daniel Pepën i kërkuan kamarierit që t’i bënte një kafe, por ky i fundit u ka thënë se ekspresi është i fikur dhe se nuk mund të bënte kafe.
Më pas sipas informacioneve Danieli i ka kërkuar që ta ndez ekspresin duke përdorur edhe fjale fyese në drejtim të kamarierit. Aty ka ndërhyre Flori Paluçi, i cili i ka thënë që ti nuk mund ta fyesh pasi kamarieri është ulur në tavolinë me mua. Pas këtij momenti kanë nisur debatet verbale mes tyre dhe kanë degjeneruar deri në përdorimin e armës së zjarrit.
Paluçi qëlloi me armë zjarri në drejtim të Kurtit, i cili fatkeqësisht humbi jetën. Ndërkohë, Daniel Pepa, mik me 23-vjeçarin, ka shkuar dhe ka marrë armën në makinën e tij dhe më pas ka qëlluar drejt 33-vjeçarit duke e lënë të vdekur në vend.
“Rreth orës 01:45 të datës 22.10.2025, në Manëz, pranë një karburanti, pas një konflikti dyshohet për motive të dobëta, kanë mbetur të vrarë me armë zjarri shtetasit A. K., 23 vjeç, dhe F. P., 33 vjeç, të dy banues në Manëz.
Nga veprimet e para hetimore të kryera nga grupi i posaçëm hetimor, dyshohet se shtetasi F. P. është vrarë me armë zjarri nga shtetasi D. P., 21 vjeç, banues në Manëz, ndërsa shtetasi A. K. dyshohet se është vrarë nga shtetasi F. P. Shërbimet e Policisë po vijojnë kontrollet intensive për kapjen e shtetasit D. P.
Ndërkohë, një grup i posaçëm hetimor, nën drejtimin e Prokurorit, po vijon punën në vendngjarje për zbardhjen e rrethanave, identifikimin e personave të tjerë të përfshirë në këtë ngjarje dhe administrimin e çdo prove, me qëllim dokumentimin e plotë ligjor të rastit.”, njoftoi Policia më herët.
