Një burrë 49-vjeçar u arrestua të shtunën pranë një tubimi të fushatës së Donald Trump në Kaliforni dhe iu gjetën armë, por u lirua me kusht në të njëjtën ditë, njoftoi zyra e sherifit të dielën.
Incidenti pasoi dy tentativa për vrasje ndaj ish-presidentit republikan të SHBA-së, aktualisht kandidat për President në zgjedhjet e 5 nëntorit.
I arrestuari quhet Vem Miller dhe është banues në Las Vegas. Një pushkë, një pistoletë e mbushur dhe një karikator u gjetën në makinën e tij, sipas Zyrës së Sherifit të Qarkut Riverside në Kaliforninë lindore.
Njoftimi thekson se nuk kishte asnjë kërcënim për sigurinë e Trump ose atyre që merrnin pjesë në ngjarje.
Miller u lirua atë mbrëmje dhe do të dalë në gjykatë më 2 janar.
Kush është Miller
Miller ka një histori të gjerë përplasjesh me ligjin, thanë burimet dhe duket se është anëtar i lëvizjes së qytetarëve sovran, një lëvizje e ekstremit të djathtë që mbështetet në teoritë konspirative dhe beson se qeveritë nuk kanë fuqi mbi ato.
FBI e ka quajtur grupin “ekstremistë anti-qeveritar”.
Miller, një republikan i regjistruar, ka një diplomë master nga UCLA dhe kishte kandiduar për Asamblenë e Shtetit të Nevadës në vitin 2022, raportoi Press-Enterprise.
Ai gjithashtu duket se zotëron një kompani CBD me bazë në Kaliforni dhe ka përkrahur teori konspirative dhe retorikë agresive mizogjene në internet.
Policët e ndaluan atë në një pikë kontrolli pranë tubimit të Coachella me një SUV të zi përpara se Donald Trump të mbërrinte.
Policia e qarkut Riverside “vunë re se pjesa e brendshme e automjetit ishte rrëmujë dhe kishte një targë false”.
Burrit iu gjetën pasaporta dhe patentë shoferi në emra të ndryshëm, automjeti i tij ishte i paregjistruar dhe targa e tij ishte false, sipas Sherif Bianco. Shërbimi Sekret dhe FBI po hetojnë incidentin.
