Botërori 2026 po afron dhe superkompjuteri i Opta ka bërë parashikimet e para për fituesin e mundshëm të turneut më të madh të futbollit.
Për herë të parë, Kupa e Botës do të zhvillohet me 48 kombëtare, ndërsa turneu do të mbahet në Shtetet e Bashkuara, Meksikë dhe Kanada. Gara nis më 11 qershor dhe finalja e madhe do të luhet më 19 korrik.
Sipas 10 mijë simulimeve të kryera nga Opta, Spanja është favoritja kryesore për të fituar trofeun, me 16.1% mundësi. Kampionët e Evropës shihen si skuadra më e fortë para nisjes së turneut, falë cilësisë në grup dhe formës së lojtarëve kryesorë.
Pas Spanjës vijnë Franca me 13%, Anglia me 11.2% dhe Argjentina me 10.4%. Këto katër kombëtare konsiderohen si pretendente kryesore për të shkuar deri në fund.
Portugalia, Brazili dhe Gjermania janë gjithashtu në garë, por me përqindje më të ulëta. Portugalia ka 7% mundësi për ta fituar Botërorin, Brazili 6.6%, ndërsa Gjermania 5.1%.
Spanja vlerësohet lart edhe për mundësinë e kalimit në fazat finale. Sipas Opta, “La Roja” ka më shumë se 50% shanse për të arritur në çerekfinale dhe 25.6% mundësi për të luajtur finalen.
Një rol të rëndësishëm në pritshmëritë për Spanjën ka edhe Lamine Yamal, i cili vjen pas një sezoni shumë të fortë me Barcelonën. Në grup janë edhe emra si Rodri, Pedri, Ferran Torres, Mikel Oyarzabal dhe Mikel Merino.
Argjentina hyn në turne si kampione në fuqi, me Lionel Messi që pritet të udhëheqë sërish skuadrën. Ndërkohë, Franca do të kërkojë një tjetër finale të madhe, Anglia synon të thyejë pritjen e gjatë për një trofe madhor, ndërsa Brazili kërkon rikthimin te lavdia pas shumë vitesh.
Sipas Opta, vetëm 35.9% e simulimeve parashikojnë që Botërori 2026 të fitohet nga një kombëtare që nuk e ka fituar më parë trofeun.
