Kryeministri në detyrë, Albin Kurti, ka shprehur ngushëllimet e tij pas ndarjes nga jeta të ish-kryeparlamentarit Nexhat Daci, duke e cilësuar atë si një figurë të rëndësishme në historinë e Republikës së Kosovës. Në një postim në Facebook, Kurti e përmendi Dacin si kryetarin e parë të Kuvendit të Kosovës pas çlirimit më 1999, i zgjedhur për dy mandate nga 2000 deri në 2006.
Daci, anëtar i Lidhjes Demokratike të Kosovës, ka qenë aktiv në politikë nga viti 2001 deri në 2011, duke shërbyer gjithashtu si deputet në Kuvendin e Kosovës. Në vitin 2007, ai ishte themelues dhe kryetar i partisë Lidhja Demokratike e Dardanisë. Një moment kyç në karrierën e tij ishte nënshkrimi i Deklaratës së Pavarësisë së Kosovës më 17 shkurt 2008, kur ai shërbente si anëtar i Kryesisë së Kuvendit.
Nexhat Daci lindi më 26 korrik 1944 në fshatin Tërnoc të Bujanocit. Ai kreu shkollimin e mesëm në Leskoc dhe vazhdoi studimet në Universitetin e Beogradit, ku arriti të mbrojë temën e magjistraturës në vitin 1968. Më pas, ai doktoroi në Universitetin e Zagrebit dhe përfundoi studimet postdoktorale në Universitetin e Bradfordit në Mbretërinë e Bashkuar. Daci nga viti 1966 punoi si asistent në degën e kimisë në Universitetin e Prishtinës, ku më vonë u emërua profesor ordinar.
Që nga vitin 1994, ai ishte anëtar korrespondent i Akademisë së Shkencave dhe Arteve të Kosovës, duke u bërë më pas anëtar i rregullt dhe duke e drejtuar atë dy herë, në periudhat 1999-2004 dhe 2018-2019. Daci është njohur si autor i shumë punimeve shkencore dhe veprave studimore në fushën e kimisë.
Kurti përfundoi mesazhin e tij me një thirrje për ngushëllime për familjen Daci, kolegët e tij profesorë dhe akademikë, duke e theksuar kontributin e Dacit në procesin e shtetndërtimit të Kosovës. Ai e cilësoi Dacin si një emër të rëndësishëm në historinë e vendit.
