Kualifikueset e Botërorit 2026/ Gjermania kthehet te fitorja, Spanja shkatërron Turqinë me “tenis” golash
Mbrëmja e së dielës në kualifikueset e Botërorit 2026 solli ndeshje plot emocione dhe gola spektakolarë në disa grupe.
Gjermania reagoi pas humbjes me Sllovakinë, duke mposhtur 3-1 Irlandën e Veriut, por “Panzerat” treguan se ende kanë shumë për të përmirësuar për të siguruar kualifikimin. Në të njëjtin grup, Sllovakia fitoi minimalisht 0-1 ndaj Luksemburgut, duke ruajtur kreun.
Në Grupin E, Gjeorgjia triumfoi bindshëm 3-0 ndaj Bullgarisë, por vëmendjen e mori Spanja, e cila shkëlqeu në transfertë duke shënuar plot 6 gola pa përgjigje ndaj Turqisë në Konia.
Holanda vuajti, por siguroi tre pikë të arta në Grupin G me fitoren 2-3 ndaj Lituanisë. Memphis Depay u kthye në protagonist absolut, duke shënuar dy gola dhe u bë golashënuesi më i mirë në historinë e “Tulipanëve”. Ndërkohë, Polonia mposhti 3-1 Finlandën.
Në Grupin J, Maqedonia e Veriut bëri një paraqitje të shkëlqyer me fitoren 5-0 kundër Lihtenshteinit, duke ruajtur vendin e parë. Belgjika e ndoqi hap pas hapi me një fitore të thellë 6-0 ndaj Kazakistanit.
Kualifikueset po shkojnë drejt një faze vendimtare, ku çdo pikë mund të bëjë diferencën për rrugën drejt Botërorit 2026.
