Kombëtarja shqiptare vijon përgatitjet për ndeshjen ndaj Serbisë, të vlefshme për kualifikueset e Kupës së Botës 2026. Dy prej futbollistëve kuqezi, Arlind Ajeti dhe Armando Broja, kanë folur për atmosferën në skuadër dhe pritshmëritë për këtë përballje të rëndësishme, duke theksuar përqendrimin dhe unitetin e ekipit.
Mbrojtësi Ajeti theksoi se skuadra është gati dhe e përgatitur për sfidën si në aspektin sportiv ashtu edhe në atë emocional:
“E shohim këtë si një ndeshje futbolli dhe synojmë të japim maksimumin për të marrë tri pikët. Do të jetë një sfidë e vështirë, por ne do të jemi profesionistë dhe të fokusuar në objektivin tonë.”
Ai vlerësoi cilësinë e lojtarëve të Serbisë, por u shpreh i bindur se Shqipëria do të jetë gati për çdo rast:
“Kanë lojtarë si Mitroviç dhe Vlahoviç, që janë shumë të fortë fizikisht, por ne do t’i analizojmë me kujdes dhe do të jemi të përgatitur për çdo situatë.”
Nga ana tjetër, sulmuesi Armando Broja vuri në dukje atmosferën pozitive brenda ekipit dhe dëshirën për të dhënë gjithçka në fushë:
“Kemi një grup të bashkuar dhe jemi të fokusuar te fitorja. Për mua më e rëndësishme është që të fitojmë, të marrim tri pikët. Normalisht, dua të shënoj, por mbi të gjitha dua të ndihmoj skuadrën.”
Broja shtoi se Shqipëria ka potencialin për të luftuar deri në fund për ëndrrën e madhe:
“Kemi një grup të fortë me ekipe si Anglia dhe Serbia, por ne do të japim maksimumin për të arritur objektivin dhe për të realizuar ëndrrën e kualifikimit në Botëror.”
Skuadra e drejtuar nga Silvinjo vijon stërvitjet me intensitet të lartë, me synimin për të qenë plotësisht gati në momentin që të zbresë në fushë për njërën nga ndeshjet më të rëndësishme të kualifikuesve.
