Kryeministri britanik, Keir Starmer, ka njoftuar ndërtimin e deri në 12 nëndetëseve të reja bërthamore me armë konvencionale, në kuadër të një rishikimi të madh të politikës së mbrojtjes së Mbretërisë së Bashkuar. Këto njësi të avancuara pritet të zëvendësojnë flotën ekzistuese të shtatë nëndetëseve të klasit Astute duke filluar nga fundi i viteve 2030.
Nëndetëset Astute luajnë rol kyç në mbrojtjen e grupimeve detare dhe mbledhjen e inteligjencës, si dhe në sigurimin e nëndetëseve të klasit Vanguard, të cilat mbajnë arsenalin bërthamor të raketave Trident të Britanisë. Në tetor të vitit të kaluar u hodh në ujë njësia e gjashtë e kësaj klase, ndërsa e shtata dhe e fundit është ende në ndërtim.
Gjithashtu qeveria britanike i kërkon Forcave të Armatosura të kalojnë në “gatishmëri për luftë” për të përballuar kërcënimet në rritje, veçanërisht ato që burojnë nga Moska. Rishikimi është udhëhequr nga ish-ministri i Mbrojtjes, Lord Robertson, dhe përmban 62 rekomandime që pritet të miratohen tërësisht nga qeveria.
Politika e rishikuar e mbrojtjes
Sa i përket rishikimit të politikës së mbrojtjes, pritet që ai të rekomandojë që forcat e armatosura të kalojnë në gatishmëri luftarake për të penguar kërcënimet në rritje me të cilat përballet vendi. Qeveria është përqendruar në kërcënimin që paraqet Moska përpara një rishikimi të mbrojtjes të udhëhequr nga ish-sekretari i mbrojtjes i Partisë Laburiste, Lord Robertson.
– Raporti jep 62 rekomandime, të cilat qeveria pritet t’i pranojë plotësisht.
– Investim prej 1.5 miliardë £ për ndërtimin e 6 fabrikave të reja për prodhimin e municioneve.
– Prodhimi i deri në 7,000 armëve me rreze të gjatë veprimi, përfshirë raketa dhe dronë.
– Krijimi i një “Komande Kibernetike dhe Elektromagnetike” për të përforcuar kapacitetet digjitale të ushtrisë në mbrojtje dhe sulm.
– 1.5 miliardë £ të tjera deri në vitin 2029 për rikonstruksionin e banesave ushtarake.
– Të paktën 1 miliard £ për teknologji të avancuar, që do të përshpejtojë sigurimin e të dhënave të objektivave për trupat në terren.
Starmer theksoi se prioritet i qeverisë së tij do të jetë aleanca e NATO-s, ndërsa Britania ka marrë angazhimin të rrisë shpenzimet për mbrojtjen nga 2.3% në 2.5% të PBB-së deri në vitin 2027, një lëvizje që u përshëndet edhe nga opozita. Megjithatë, ka mosmarrëveshje mbi objektivin e arritjes së 3% të PBB-së për mbrojtjen, siç kërkon NATO.
Qeveria synon ta realizojë këtë objektiv deri më 2034, ndërsa Partia Konservatore kërkon që kjo të ndodhë brenda dekadës aktuale. Kjo qasje e re e Britanisë sinjalizon një kthesë drejt fuqizimit të kapaciteteve ushtarake dhe përgatitjes për skenarë më të ashpër sigurie në të ardhmen e afërt.
