Toni Kroos, ish-mesfushori i Real Madrid, reagoi ndaj vendimit të diskutueshëm në ndeshjen PSG–Bayern (1-2), duke e cilësuar të padrejtë përjashtimin e Luis Díaz. Në podcastin e tij Einfach mal Luppen, gjermani tha: “Për mua është e qartë, nuk ishte karton i kuq. Arbitri e la shumë të ndikohej nga dëmtimi i Hakimit.”
Kroos shtoi se gjyqtari duhej të vlerësonte veprimin, jo pasojat e tij: “Nëse Hakimi do të ishte ngritur pas ndërhyrjes, askush nuk do të kishte rishikuar episodin.” Ai kritikoi edhe ndërhyrjen e VAR-it, duke theksuar se vendimi nuk duhet të bazohet në reagimin fizik të lojtarit të dëmtuar.
Gjermani shtoi se, pavarësisht incidentit, Bayern ishte dukshëm superior dhe “do ta kishte fituar ndeshjen edhe me 11 kundër 11.” Në fund, Kroos komentoi edhe humbjen e Real Madrid në Anfield, duke e quajtur “një rezultat që tregon konkurrencën e ashpër të këtij sezoni.”
