Kryetari i Bashkisë së Vaut të Dejës, Kristian Shkreli është paraqitur mëngjesin e kësaj të premte pranë ambienteve të Prokurorisë së Posaçme kundër Korrupsionit dhe Krimit të Organizuar.
Burime për mediat bëjnë me dije se prokurorët do t’i komunikojnë Shkrelit ditën e sotme akuzat për korrupsion zgjedhor.
Pas dyshimeve se në zgjedhjet parlamentare të 11 Majit, Shkreli bleu vota në favor të PSD-së së Tom Doshit, SPAK i sekuestroi atij telefonit. Gjithashtu, në kuadër të hetimeve, Prokuroria e Posaçme sekuestroi edhe aparatet celularë të disa eksponentëve të tjerë të PSD-së të cilët dyshohet se janë përfshirë në veprimtarinë kriminale të shitblerjes së votës në qarkun e Shkodrës.
Kristian Shkreli është zgjedhur kryebashkiak i Vaut të Dejës në zgjedhjet e 14 Majit 2023, nën siglën e Partisë Socialiste, por mesa duket situata ka ndryshuar edhe në bazë menjëherë pas krisjes së marrëdhënies mes aleatëve Rama-Doshi.
Ka qenë vetë kryeministri Edi Rama i cili në takimin përmbyllës të fushatës në Vaun e Dejës, paralajmëroi kryebashkiakun që të mos “luante me dy porta”.
“Kristian mos më luaj me dy porta, Kristian! Mos më luaj me dy porta!”, këto ishin fjalët e kreut të qeverisë dhe njëherësh kryesocialisit Rama gjatë takimit të zhvilluar me strukturat atje.
Vetëm një javë nga dita e zgjedhjeve të 11 Majit, Rama e paralajmëroi publikisht kryebashkiakun socialist që të mos bëhej palë me Tom Doshin.
Zërat se situata nuk ishte fort e qetë në zonë kishin shkuar dhe në veshin e kryeministrit, ndaj dhe Edi Rama si rrallëherë, u detyrua ta paralajmëronte publikisht Kristian Shkrelin që të mos luante me dy porta.
