Kosova ka zhvilluar stërvitjen e fundit për ndeshjen e parë të play-offit për Ligën B të Ligës së Kombeve kundër Islandës, e cila zhvillohet të enjten mbrëma në stadiumin “Fadil Vokrri” në Prishtinë. Të gjithë futbollistët ishin të pranishëm në seancën e fundit stërvitore, ndërsa përzgjedhësi Franco Foda ka punuar në detajet e fundit taktike.
Seanca stërvitore e zhvilluar të mërkurën ishte e karakterizuar nga një atmosferë pozitive dhe dinamike, me ekipin që u fokusua në skemat sulmuese dhe mbrojtëse. Kapiteni i Kosovës, Amir Rrahmani dhe mesfushori Valon Berisha janë të gatshëm për lojë, pasi në stërvitjen e sotme kanë punuar së bashku me pjesën tjetër të ekipit.
Kosova kërkon avancimin në Ligën B pas një ecurie të mirë në Ligën C, ndërsa Islanda synon të mbetet në këtë nivel. Dueli i kthimit zhvillohet të dielën në Murcia të Spanjës.
Në konferencën për media, përkrah trajnerit Arnar Gunnlaugsson, ishte edhe kapiteni i ri i Islandës, Orri Steinn Oskarsson. Ai e konsideron Kosovën një ekip me vlera dhe ka vlerësuar si mbrojtjen, ashtu edhe sulmin e “Dardanëve”.
“Ne e dimë se Kosova ka disa lojtarë të mirë dhe i dimë kualitetet e tyre. I kemi analizuar dhe e dimë se do të jenë dy ndeshje shumë të vështira”, ka thënë fillimisht Oskarsson.
“Kosova ka disa mbrojtës të mirë dhe lojtarë që dalin para shumë shpejt. Mendoj se do të varet nga ne që të jemi në gjendje t’i ndalim rreziqet që vijnë nga ta në këto dy ndeshje”.
Islanda ka një histori të shkurtër, por të suksesshme në skenën ndërkombëtare. Kombëtarja nordike ka marrë pjesë në dy turne madhorë – një herë në Kampionatin Botëror dhe një herë në Kampionatin Evropian.
Ambicia e tyre mbetet kualifikimi në kompeticione të tjera të mëdha, por për momentin objektivi kryesor është sigurimi i qëndrimit në Ligën B të Ligës së Kombeve.
