Fshatrat e Korçës po përballen me një realitet të hidhur: emigracioni dhe rënia e lindshmërisë po boshatisin komunitetet dhe po mbyllin shkollat. Vetëm në pesë vitet e fundit, në këtë qark kanë mbyllur dyert 22 shkolla për shkak të mungesës së nxënësve.
Dardha, Boboshtica dhe Polena janë ndër fshatrat që po preken më shumë nga kjo situatë. Dikur të gjalla dhe plot me fëmijë, sot ato po shuhen ngadalë. Antonia Caprazi, ish-mësuese në Boboshticë, kujton me mall kohën kur shkolla e fshatit kishte gati 200 nxënës. Sot, ndërtesa është e zbrazët dhe e mbyllur me dryn.
E njëjta panoramë është edhe në fshatin Polenë, ku këtë vit edhe pak nxënës që kishin mbetur janë detyruar të ndjekin mësimin në një shkollë tjetër.
Mbyllja e këtyre institucioneve arsimore është pranuar edhe nga Drejtoria Vendore e Arsimit në Korçë, e cila arsyeton vendimet me rënien drastike të numrit të fëmijëve në zonat rurale.
Emigracioni dhe lindjet e pakta mbeten dy faktorët kryesorë që po çojnë drejt shuarjes së shkollave, dhe bashkë me to, edhe jetën në këto fshatra.
