Kontinenti europian është futur në një fazë të rrezikshme të motit ekstrem, pasi vala e parë e të nxehtit për këtë verë ka përfshirë shumë shtete, duke çuar temperaturat deri në 42 gradë Celsius. Kjo situatë ka vënë në alarm autoritetet lokale dhe kombëtare në të gjithë Evropën, të cilat po ndërmarrin masa urgjente për të mbrojtur qytetarët dhe mjedisin.
Në Spanjë, instituti shtetëror i motit Aemet ka dhënë paralajmërime të posaçme për valën e të nxehtit që pritet të godasë jugun e vendit në ditët në vijim. Temperatura shumë të larta, të qëndrueshme gjatë ditës dhe natës, paraqesin rrezik për grupet më të prekshme si të moshuarit, gratë shtatzëna dhe personat me probleme kronike shëndetësore. Ministria e Shëndetësisë në Madrid u ka kërkuar qytetarëve të shmangin qëndrimin në diell dhe të konsumojnë sa më shumë lëngje për të shmangur pasojat nga dehidratimi dhe goditjet e nxehtësisë.
Në Portugali, dy të tretat e territorit do të jenë në alarm të lartë për vapë ekstreme dhe rrezik zjarresh, veçanërisht në zonat pyjore. Në Lisbonë, termometri pritet të shënojë 42 gradë Celsius, ndërsa autoritetet janë në gatishmëri për ndërhyrje emergjente. Franca po përjeton gjithashtu temperatura të pazakonta për këtë periudhë. Në Marsejë, ndërsa vapa arrin gati 40 gradë, pushteti vendor ka vendosur që hyrja në pishinat publike të jetë falas, për të ndihmuar banorët të përballojnë të nxehtin. Në Itali, rajone si Sicilia dhe Liguria kanë ndaluar punën në ambient të hapur në orët më të nxehta të ditës, dhe sindikatat po kërkojnë zgjerimin e kësaj mase në të gjithë vendin.
Ndërkohë, në Greqi, temperaturat afër 40 gradëve kanë shkaktuar zjarr në afërsi të Athinës, duke detyruar autoritetet të evakuojnë zona të tëra dhe të mbyllin rrugë strategjike që lidhin kryeqytetin me jugun. Situata ka shqetësuar edhe industrinë turistike, pasi ndërhyrjet emergjente përfshinë edhe atraksione historike si Tempulli i Poseidonit.
Valët e nxehtësisë si kjo nuk janë më përjashtim, por po shndërrohen në një normë të re. Të dhënat nga Copernicus, shërbimi evropian i monitorimit të klimës, tregojnë se Evropa po ngrohet më shpejt se çdo kontinent tjetër. Marsi i këtij viti ishte më i nxehti i regjistruar ndonjëherë, dhe viti i kaluar shënoi një rekord historik të temperaturave globale.
Shkencëtarët paralajmërojnë se për shkak të ndryshimeve klimatike, fenomenet ekstreme si valët e të nxehtit, thatësirat dhe stuhitë pritet të bëhen gjithnjë e më të shpeshta dhe më të rënda. Sipas një studimi të publikuar nga Lancet Public Health, vdekjet e shkaktuara nga nxehtësia në Evropë mund të trefishohen deri në fund të shekullit, me vendet mesdhetare – si Spanja, Italia dhe Greqia – që do të goditen më rëndë.
Ndërsa vera sapo ka nisur, rreziku është i qartë: në mungesë të veprimeve të koordinuara dhe afatgjata ndaj ndryshimeve klimatike, temperaturat përvëluese nuk do të jenë më një përjashtim sezonal – por realiteti i përditshëm i brezave të ardhshëm.
