Një konflikt i vazhdueshëm që ka nisur një vit më parë mes dy familjeve të njohura në Shëngjin, Ndoka dhe Nikulaj, ka kulmuar në atentatin e fundit në Lezhë, ku u plagos gabimisht Sokol Daci. Gazetari Artan Hoxha, në emisionin “Shqipëria Live,” ka përshkruar se si ka filluar ky konflikt mes dy klaneve, duke theksuar se ngjarja mund të ishte shmangur.
Të dy familjet janë të njohura për ndikimin e tyre në shoqëri dhe politikë, me pasuri, përfshi hotele në zonën e plazhit. Ndikimi politik i Nikulajve është evident, pasi ata kanë krijuar një forcë politike dhe janë angazhuar në aleanca të tjera, ndërsa Ndokajt kanë një histori të gjatë në politikë, me një anëtar të familjes që ka shërbyer si kryetar i këshillit bashkiak dhe një tjetër si deputet.
Hoxha thotë se atentati ndaj Ardian Nikulajt sjell pasoja të rënda, duke theksuar se, nëse do të ishte gjallë ai, gjërat do të ishin ndryshe, pasi do ta kishte thirrur tjetër palën për dialog. Edhe pse të dyja familjet kanë armiq të tjerë, duket se situata është bërë më e ndërlikuar dhe se asnjëra nga palët nuk dëshiron të shtojë një konflikt tjetër në mesin e rivaliteteve ekzistuese.
Hoxha thekson gjithashtu se roli i policisë ne këtë rast është më shumë për parandalim sesa për zbulimin e ngjarjes pas krimit, duke kërkuar një hetim të plotë të situatave të mëparshme për të parandaluar përshkallëzimin e situatës. Ai tregon se mungesa e arrestimit të autorëve të parë krijon mundësi për një ngjarje të tretë, e cila mund të ketë pasoja katastrofike për komunitetin.
Gazetari e mbyll duke u shprehur se është shqetësuese të mendohet se çfarë mund të ndodhë nëse tensionet mes klaneve shpërthejnë në mes të qytetit të Lezhës, duke vënë në rrezik jetën e qytetarëve të pafajshëm.
