Kompania Meta ka nisur përdorimin e përmbajtjes publike nga përdorues të rritur në BE, të postuar në Facebook, Instagram dhe platformat e tjera të saj, për të trajnuar modelet e inteligjencës artificiale. Ky hap synon përmirësimin e Meta AI, në mënyrë që të pasqyrojë më saktë gjuhët dhe kulturat evropiane.
Përdoruesit në Bashkimin Europian do të informohen për këtë ndryshim dhe do të kenë mundësinë të kundërshtojnë përfshirjen e të dhënave të tyre në procesin e trajnimit. Meta ka theksuar se mesazhet private dhe të dhënat e të miturve nuk do të përfshihen në këtë proces.
Kompania nënvizon se kjo qasje tashmë është në funksion në vende të tjera dhe është në linjë me praktikat e ndjekura nga Google dhe OpenAI. Pasi mori dritën jeshile nga autoritetet evropiane, Meta ka rifilluar këtë proces, i cili më parë ishte ndalur për arsye ligjore.
Ky veprim është pjesë e strategjisë së Meta-s për të mbetur konkurruese në garën globale të zhvillimit të inteligjencës artificiale.
