Kombëtarja shqiptare ka nisur përgatitjet për dy miqësoret e muajit qershor ndaj Izraelit dhe Luksemburgut, me objektivin për të ndërtuar një identitet të qartë nën drejtimin e trajnerit të ri, Rolando Maran.
Në konferencën për media të zhvilluar në “Air Albania”, Myrto Uzuni dhe Juljan Shehu folën për atmosferën brenda grupit, konkurrencën në skuadër dhe rëndësinë e këtyre ndeshjeve në prag të sfidave të Ligës së Kombeve.
Uzuni vlerësoi qasjen e trajnerit të ri, duke theksuar se sistemi mund t’i japë më shumë mundësi ofensivës. Sulmuesi kuqezi u shpreh se, me trajnerë që aplikojnë lojë më sulmuese, skuadra ka pasur më shumë raste për të shënuar.
Ai foli edhe për të ardhmen e tij në nivel klubi, duke konfirmuar se ka kontratë me Austin. Uzuni tregoi se në janar kishte pasur një mundësi shumë të mirë transferimi, por operacioni nuk u finalizua.
Për Kombëtaren, sulmuesi theksoi se objektivat mbeten të qarta: vendi i parë në Nations League dhe kualifikimi në Euro 2028. Sipas tij, çdo lojtar që vesh fanellën kuqezi duhet të ketë uri për fitore dhe dëshirë për të luajtur në turne madhorë.
Nga ana tjetër, Juljan Shehu u ndal te ndryshimet që mund të sjellë Maran në mënyrën e lojës. Mesfushori tha se çdo trajner ka idetë e veta dhe se ai është gati të japë maksimumin, pavarësisht pozicionit ku do të aktivizohet.
Shehu e cilësoi të rëndësishme këtë fazë përgatitore, duke theksuar se miqësoret ndaj Izraelit dhe Luksemburgut duhet t’i shërbejnë skuadrës për të krijuar vazhdimësi dhe për t’u përgatitur sa më mirë për ndeshjet e shtatorit.
Ai foli edhe për prurjet e reja, duke theksuar se konkurrenca është pozitive për grupin dhe se në Kombëtare duhet të luajë ai që e meriton më shumë.
