Pikërisht tre vite më parë, më 18 dhjetor 2022, u zhvillua një nga finalet më të pabesueshme në historinë e Kupës së Botës. Argjentina dhe Franca u përballën në një duel epik, që mbetet ende sot i paharrueshëm për tifozët anembanë botës.
Pjesa e parë u mbyll me epërsinë 2–0 të Argjentinës. Lionel Messi realizoi nga pika e bardhë, ndërsa Ángel Di María dyfishoi shifrat pas një aksioni perfekt. Gjithçka dukej nën kontroll për “Albicelestet”.
Por pjesa e dytë ndryshoi rrjedhën e historisë. Në minutën e 80-të, Kylian Mbappé shënoi nga penalltia dhe vetëm një minutë më pas goditi sërish, duke barazuar rezultatin në 2–2 dhe duke e çuar finalen në shtesë.
Në minutën e 108-të, Argjentina kaloi përsëri në avantazh. Messi ishte më i shpejti në zonë dhe e shtyu topin në rrjetë për 3–2. Megjithatë, drama nuk kishte mbaruar. Dhjetë minuta më vonë, Mbappé kompletoi tregolëshin, duke e barazuar sërish rezultatin në 3–3.
Në sekondat e fundit të shtesës, Franca pati shansin e artë për të fituar. Kolo Muani doli përballë Emiliano Martínez, por portieri argjentinas realizoi një pritje monumentale, duke e çuar ndeshjen në penallti.
Në serinë nga pika e bardhë, shënuan Messi, Mbappé dhe Dybala, por Coman dhe Tchouaméni gabuan për Francën. Argjentina ishte perfekte dhe fitoi penalltitë, duke u shpallur kampione e botës për herë të tretë në histori.
Për Lionel Messin, ishte momenti më i madh i karrierës: Kupa e Botës e parë, që e kompletoi përgjithmonë legjendën e tij.
