Jurgen Klopp ka shprehur mbështetjen e tij për Florian Wirtz, duke thënë se ylli i Gjermanisë ka potencialin për të qenë një nga lojtarët kryesorë të Botërorit që do të zhvillohet në Amerikën e Veriut.
Ish-trajneri i Liverpool beson se bashkëkombësi i tij ka treguar karakter gjatë sezonit të parë në “Anfield”, pavarësisht vështirësive të përshtatjes në Premier League.
Wirtz ka kaluar një sezon të parë me ulje-ngritje në Angli. Disa analistë kanë qenë kritikë ndaj 22-vjeçarit, por ai ka treguar momente cilësie që dëshmojnë se po përshtatet me kërkesat e futbollit anglez. Periudha më pozitive për të ishte mes dhjetorit dhe janarit, kur shënoi pesë gola dhe dha tre asistime në 15 ndeshje.
Edhe te Gjermania, Wirtz është kthyer në një lojtar shumë të rëndësishëm për skemat e Julian Nagelsmann. Ai ka nisur si titullar çdo ndeshje të kombëtares gjatë vitit të fundit, përfshirë edhe paraqitjen e shkëlqyer ndaj Zvicrës, ku regjistroi dy gola dhe dy asistime.
Duke folur për “BBC Sport” mbi lojtarët që mund të shkëlqejnë në Botëror, Klopp tha:
“Shpresoj që Flo Wirtz të ketë një Botëror fantastik, vërtet fantastik. Mendoj se ai ka gjithçka që duhet për të qenë një lojtar vendimtar. Nuk dua t’i vendos presion djaloshit, por realisht mendoj se ai ka treguar tashmë sa i mirë mund të jetë në një sezon të vështirë.”
Botërori 2026 pritet të sjellë edhe përballje të veçanta mes disa prej ish-lojtarëve të Klopp te Liverpool. Një prej tyre mund të jetë dueli mes Andy Robertson të Skocisë dhe Alisson Becker të Brazilit.
“Shpresoj që lojtarët e mi të kenë një Botëror të madh. Shpresoj që Andy Robertson dhe Alisson Becker ta shijojnë momentin kur të përballen me njëri-tjetrin. Imagjino të kesh luajtur bashkë për kaq shumë vite dhe pastaj të takohesh në një ndeshje të tillë në Botëror. Duhet të jetë një nga momentet më të lumtura në jetë”, u shpreh Klopp.
Ai përmendi gjithashtu edhe emra të tjerë të rëndësishëm nga periudha e tij te Liverpool, si Virgil van Dijk, Mohamed Salah, Sadio Mané dhe Alexis Mac Allister.
“I uroj Virgil një turne të madh. Vërtet shpresoj që Mo të ketë një turne të madh. Po ashtu edhe Sadio. Edhe Macca, nëse Argjentina e fiton sërish. Ishte shumë bukur ta shihje me medalje në qafë kur u kthye te Brighton”, përfundoi Klopp.
