Bayern Munich ka marrë një fitore të rëndësishme në fundjavë në transfertë ndaj Freiburg, bavarezët fituan me shifrat 2-1. Goli i parë u shënua nga i zakonshmi Harry Kane, ndërsa goli i dytë nga Kim Min-jae me asistin e Joshua Kimmich.
Ishte pikërisht ky i fundit që nuk i mbajt dot nervat në një deklaratë që bëri për Bild pas ndeshjes, kur u pyet mbi lajmet e fundit që e lidhin me një transferim të mundshëm te Real Madrid.
Kimmich tha se nuk mund të flasë për të ardhmen e tij në çdo dy-tre ditë dhe të komentojë mbi lajmet që qarkullojnë për të. “I qëndroj deklaratës që kam bërë dy javë më parë dhe sinqerisht, nuk mund t’ju sjell informacione të reja çdo tre ditë. Nuk do flas në çdo tre ditë për të ardhmen time”, tha mesfushori gjerman.
Kujtojmë se Kimmich është në muajt e fundit të kontratës me Bayern dhe deri tani nuk ka shenja për një rinovim, ndaj dhe është shtuar interesi i shumë klubeve të mëdha për të.
Tre ekipet që janë më të interesuara për gjermanin janë Barcelona, Real Madrid dhe Liverpool, por lista mund të shtohet akoma dhe më shumë në vijim.
