Këshilli i Ministrave ka miratuar krijimin e Regjistrit Qendror të Bazës së të Dhënave të Pasurive të Paluajtshme, një sistem që do të administrojë kadastrën fiskale dhe do të përmbajë informacione të rëndësishme për ndërtimet dhe pronarët e tyre. Qëllimi kryesor është menaxhimi më i mirë i taksave mbi ndërtesat dhe sigurimi i evidencës së saktë për këto pasuri.
Ky regjistër do të krijohet nga Drejtoria e Përgjithshme e Taksës së Pasurisë (DPTP) në bashkëpunim me Agjencinë Kombëtare të Shoqërisë së Informacionit. DPTP do të ketë përgjegjësinë e plotë për administrimin dhe mirëmbajtjen e regjistrit. Të dhënat që do të përmbajë ky sistem janë të ndryshme dhe do të përfshijnë informacione për ndërtesat, pronarët, zhvilluesit, si dhe zonat e vlerave të pronave.
Në kuadër të regjistrit, do të regjistrohen gjithashtu detajet për taksat e aplikueshme për njësitë e ndërtesave, përfshirë shkallët e taksës për përdorim banimi dhe aktivitete ekonomike. Regjistri do të tregojë gjithashtu historinë e pagesave dhe çdo borxhe tatimore që mund të kenë pronarët.
Bashkitë do të luajnë një rol të rëndësishëm në aplikimin e këtij sistemi. Ato do të kenë detyrimin që nga 10 shkurt 2026 të menaxhojnë taksën mbi ndërtesat në këtë regjistër. Ndër të tjera, bashkitë do të regjistrojnë dhe do të korrigjojnë të dhënat sipas vendimeve administrativ e gjyqësor.
Regjistri do të ndërveprojë me baza të tjera të të dhënave si regjistri i pasurive të paluajtshme, regjistri kombëtar i gjendjes civile dhe ai i adresave, duke siguruar një informacion të integruar dhe të saktë për qytetarët dhe institucionet.
Ky hap përmirëson transparencën dhe efikasitetin në administrimin e taksave dhe është një forcim i sistemit të drejtësisë fiskale në vend.
