Kelly, i cili fitoi zemrat e publikut gjatë pjesëmarrjes së tij në Big Brother VIP, ka ndarë një lajm të vështirë me ndjekësit në rrjete sociale. Në një postim prekës, ai ka shpjeguar arsyen e shkëputjes nga koncertet dhe ekrani, duke bërë me dije se po përballet me një gjendje shëndetësore të rëndë.
Ai ka treguar se vuan nga një paralizë faciale, e cila i ka prekur gjysmën e fytyrës, qafën dhe edhe kordat zanore, duke e bërë të pamundur rikthimin e tij në skenë për momentin.
“Nuk është e lehtë të shohësh veten ndryshe, por me ndihmën e mjekëve, me besimin në Zot, me forcën që më jep familja dhe dashuria që kam marrë nga shumë prej jush, shpresoj ta kaloj këtë sfidë,” – shkruan Kelly.
Megjithatë, ai nuk humb shpresën dhe premton se shumë shpejt do të rikthehet pranë publikut, më i fortë se kurrë:
“Muzika mbetet forca ime dhe shumë shpejt do jem pranë jush, më i fortë dhe me më shumë energji se kurrë. Ju dua,” – ka përfunduar ai.
