Dy shtetas shqiptarë janë arrestuar në Itali pas një operacioni të Guardia di Finanza, gjatë të cilit u sekuestruan mbi 160 kilogramë kokainë të fshehura në një kamion. Aksioni u zhvillua mes provincave Bergamo dhe Brescia dhe konsiderohet një nga sekuestrimet më të mëdha të kohëve të fundit në këtë zonë.
Operacioni u realizua gjatë kontrolleve të shtuara në zonat industriale, të cilat autoritetet i konsiderojnë strategjike për trafikun e lëndëve narkotike. Efektivët e Njësisë së Policisë Ekonomiko-Financiare të Brescias vunë re lëvizje të dyshimta rreth një autoartikulati të ndaluar në një komunë të provincës së Bergamos.
Sipas hetimeve, drejtuesi i kamionit shfaqte sjellje të dyshimta dhe hyri në rimorkio pak para se pranë mjetit të mbërrinte një automjet tjetër. Gjatë dorëzimit të shtatë çantave të mëdha drejtuesit të makinës tjetër, ndërhyri Guardia di Finanza.
Në brendësi të çantave u gjetën 150 pako kokainë, me një peshë totale mbi 160 kilogramë. Ngarkesa e drogës, nëse do të hidhej në treg, do të sillte fitime rreth 20 milionë euro.
Dy të arrestuarit, të dy me origjinë shqiptare, janë dërguar në burgun e Bergamos dhe ndodhen në dispozicion të autoriteteve gjyqësore, ndërsa hetimet vijojnë për të zbuluar lidhje të mundshme me organizata më të gjera kriminale.
