Anglia e nisi Botërorin me një fitore të madhe ndaj Kroacisë, duke triumfuar 4-2 në një ndeshje ku Jude Bellingham mori skenën dhe Luka Modric u duk i pafuqishëm për të ndalur ritmin e “Tre Luanëve”.
Skuadra e Thomas Tuchel tregoi menjëherë se nuk ka ardhur në këtë Botëror për të bërë figurë. Me Harry Kane dhe Bellingham në rolet kryesore, Anglia dominoi një Kroaci që, pavarësisht reagimit në disa momente, u dorëzua përballë intensitetit anglez.
Ndeshja nisi me gabimin e Modricit, i cili shkaktoi penallti pas një ndërhyrjeje ndaj Maduekes. Kane fillimisht u ndal nga Livakovic, por VAR-i vendosi përsëritjen e penalltisë, pasi portieri kroat kishte lëvizur nga vija. Në tentativën e dytë, sulmuesi i Bayern Munich nuk gaboi.
Kroacia reagoi me Baturinan, i cili barazoi me një goditje të bukur pas asistimit të Sucic. Megjithatë, Anglia goditi sërish para pushimit, kur Kane shënoi golin e dytë pas një krosimi nga këndi të Declan Rice. Kroatët nuk u dorëzuan dhe Sucic riktheu përkohësisht baraspeshën në shtesë.
Por në pjesën e dytë erdhi momenti i madh i Bellingham. Mesfushori i Real Madrid gjeti hapësirën mes mbrojtësve kroatë, hyri në zonë dhe mposhti Livakovicin, duke i dhënë Anglisë avantazhin që ndryshoi ndeshjen.
Modric, në Botërorin e tij të fundit, nuk arriti të ndikonte si dikur. I lodhur dhe jashtë ritmit të ndeshjes, ai u zëvendësua rreth minutës së 60-të, ndërsa i gjithë stadiumi në Dallas e përcolli me duartrokitje legjendën kroate.
Në fund, Marcus Rashford vulosi fitoren angleze me golin e katërt, pas një aksioni të bukur dhe një asistimi nga Saka. Një gol që mbylli çdo shpresë të Kroacisë dhe konfirmoi forcën e Anglisë në këtë debutim.
Anglia dha një sinjal të fortë për rivalët. Skuadra e Tuchel duket më direkte, më vertikale dhe më e rrezikshme se më parë, ndërsa Kroacia largohet nga ndeshja me shumë pikëpyetje dhe me ndjesinë se epoka e Modricit po i afrohet fundit.
