Ish-zv.presidentja e SHBA-së Kamala Harris ka mbajtur nje fjalim 15 minutësh, duke folu me tone të ashpra ndaj presidentit Donald Trump. Harris deklaroi nga San Francisko, se SHBA-ja po përjeton një braktisje me shumicë të idealeve më të larta të Amerikës, ndërsa akuzoi Trumpin se po mbjell frikë dhe kaos për të konsoliduar pushtetin e tij.
Ajo theksoi se presidenca e tij e re është duke ndjekur një kurs të rrezikshëm që po e çon vendin drejt një krize kushtetuese. Gjithashtu Harris vlerësoi figurat që sipas saj, kanë qëndruar përballë axhendës agresive të Trump nga anëtarët e Kongresit dhe gjyqtarët, te universitetet dhe qytetarët e zakonshëm që mbrojnë të drejtat sociale dhe ligjore.
“Mbështeten në idenë se, nëse mund t’i bëjnë disa njerëz të frikësohen, kjo do të ketë një efekt te të tjerët. Por ajo që kanë anashkaluar është se frika nuk është e vetmja gjë që është ngjitëse. Guximi është ngjitës,” tha Harris.
Fjalimi i Harris vjen në një moment të rëndësishëm politik për të. Pasi ka mbajtur një profil të ulët pas humbjes së saj ndaj Trump në zgjedhjet e fundit presidenciale, ajo thuhet se po shqyrton mundësinë për një kandidim për guvernatore të Kalifornisë në vitin 2026 ose për një rikthim në garën presidenciale më 2028.
Përpara të mërkurës, Harris mezi e kishte përmendur Trumpin me emër që kur ajo pranoi humbjen ndaj tij në nëntor. Duke i nxitur amerikanët të mobilizohen dhe të marrin pjesë aktive në jetën politike, Harris e mbylli fjalimin me thirrjen e drejtpërdrejtë: “Le ta mbyllim çështjen”.
