Kalifornia nuk po gjen qetësi. Pas zjarreve fatale të javës së kaluar, sërish ka shpërthyer një tjetër zjarr i fuqishëm.
Vatra e zjarri po përhapet me shpejtësi, kjo ka detyruar rreth 31,000 persona të evakuohen nga shtëpitë e tyre, si dhe janë paralajmëruar gjithashtu 23,000 të tjerë për mundësinë e evakuimit.
Zjarri ka filluar gjatë orëve të para të mëngjesit pranë liqenit Castaic, rreth 40 milje larg zjarreve Eaton dhe Palisades që shkatërruan disa zona të Los Angeles në fillim të këtij muaji.
Sipas raportimeve të Departamentit të Pyjeve dhe Mbrojtjes nga Zjarri në Kaliforni (Cal Fire), brenda disa orësh, flakët kanë djegur mbi 9,400 hektarë dhe janë jashtë kontrollit.
Shefi i zjarrfikësve të kontesë së Los Anxhelosit, Anthony Marrone njoftoi se situata është dinamike dhe se zjarri është tejet i vështirë për t’u frenuar.
