Gazetari Armand Shkullaku ka komentuar dekretin e presidentit Bajram Begaj për caktimin e datës 9 nëntor për zgjedhjet e parakohshme në Tiranë, duke theksuar se ky akt është thjesht zbatim i një urdhri të kryeministrit Edi Rama.
I ftuar në “SYRI TV”, Shkullaku u shpreh se vëmendja nuk duhet të përqendrohet te presidenti Begaj, të cilin e konsideroi thjesht formal në këtë proces, por tek vendimi politik i Ramës për të përcaktuar këtë moment për zhvillimin e zgjedhjeve.
“Ushtari e ka një mision, shkon dhe e bën. Rama nuk i thotë ‘firmose’, por thjesht i çon dekretin sepse nuk ka ku shkon. Begaj nuk ka asnjë rol real në këtë proces, ndaj të merresh me të është si të merresh me një kalë të ngordhur”, u shpreh Shkullaku.
Ai shtoi se nuk kishte asnjë urgjencë për caktimin e datës, duke argumentuar se vendimi i Ramës kishte si qëllim të tregonte se pushteti i tij mbetet absolut.
“Rama e bëri këtë për të treguar se iluzioni se ai do të bëhej më tolerant është i pavërtetë. Në histori nuk ka ndodhur që një pushtet autokratik të bëhet më demokratik. Në këtë fazë, lideri nuk kënaqet më nga pushteti, por nga tallja dhe nënshtrimi. Ai do t’u tregojë të gjithë shqiptarëve se ‘Gjykata Kushtetuese jam unë, presidenti jam unë’”, deklaroi Shkullaku.
