Një takim i zhvilluar pasditen e së enjes në një hotel në Tiranë mes Ervin Salianjit dhe disa prej figurave më të votuara të Partisë Demokratike, ka rikthyer në qendër të vëmendjes lëvizjet e brendshme në selinë blu.
Ky takim u zhvillua me dyer të mbyllura dhe pa deklarata në media, gjë e cila nxiti menjëherë spekulimet se brenda Partisë Demokratike po “formohet” një grupim i ri i cili do të kërkojë një lëvizje të strukturave.
Në lidhje me këtë “kafe” të famshme të këtij grupi demokratësh ka patur reagime të shumta. Së fundi avokati i kreut të PD Sali Berisha, Genci Gjokutaj, ka ironizuar mbledhësin e këtij takimi Ervin Saliajnin.
Me anë të një statusi në llogarinë e tij në rrjetin social “Facebook”ai ka “sulmuar” të gjithë “jaranët që janë kandidat të rinj”.
Gjokutaj me ironi ngre pyetjen:“ Mos po lind ndonjë trend i ri politiko – erotik që ca zhigolo janë mbledhur në kafeteri dhe flasin e bisedojnë për “plakën” partnere?”
Teksa më tej ka shtuar se mos ndoshta PD ja ka marrë fund, “Pastaj kjo PD-ja sado moshatare prindërit i ka gjallë dhe mirë do ishte të drejtoheshin në familje që kjo krushqi të ngjiste!”shkruan ai duke nënkuptuar që nuk ka qënë “udhës” që ky takim të zhvillohej me “të mëdhenjtë” e partisë.
“Gjithsesi hoxha që i ka yshtur dhe u ka shkruar nuskat më thotë që kafetë kanë bërë mirë që i kanë pirë por i kisha porositur që ta pinin turke me qëllim që të shikonin edhe filxhanin! Këtë porosi nuk ma kanë dëgjuar po thotë hoxha i dëshpëruar ndaj kjo krushqi vështirë të bëhet!”përfundon ai.
Kujtojmë se Në takimin e thirrur nga Ervin Salianji ishin të pranishëm Ilir Alimehmeti (më i votuari në Qarkun Tiranë), Hysen Kadiu (më i votuari në primare), Aulon Kalaja (më i votuari në listën e hapur të Durrësit), Gent Çela (Qarku Fier), Qani Xhafa (Qarku Elbasan), Ted Kopliku (Qarku Shkodër), Xhemal Gjunkshi (Qarku Dibër), Alma Kore (Qarku Gjirokastër), Parid Mahmutaj (Qarku Berat), Nada Daullja (Qarku Vlorë), si dhe një sërë kandidatesh të votuara dhe fitues të primareve.
Postimi i plotë:
Siç po dëgjojmë këtë PD-në “plakë” po e gjuajnë e zilepsin shumë dhe madje të gjithë jaranët kandidatë janë të rinj!
Çfarë të ketë ndodhur vallë?
Mos po lind ndonjë trend i ri politiko – erotik që ca zhigolo janë mbledhur në kafeteri dhe flasin e bisedojnë për “plakën” partnere?
Pastaj nëse PD-ja në moshë të thyer ka marrë fund, apo nuk kthehet më siç thonë bandillët ateherë përse ju hyn në punë axhaminjve politikanë që janë mësuar ndryshe?
Pastaj kjo PD-ja sado moshatare prindërit i ka gjallë dhe mirë do ishte të drejtoheshin në familje që kjo krushqi të ngjiste!
Gjithsesi hoxha që i ka yshtur dhe u ka shkruar nuskat më thotë që kafetë kanë bërë mirë që i kanë pirë por i kisha porositur që ta pinin turke me qëllim që të shikonin edhe filxhanin! Këtë porosi nuk ma kanë dëgjuar po thotë hoxha i dëshpëruar ndaj kjo krushqi vështirë të bëhet!
