Juventus po përgatit një revolucion në sulm pas një sezoni zhgënjyes dhe Luciano Spalletti kërkon fytyra të reja për të rikthyer skuadrën në garë për objektiva të mëdhenj.
Drejtori Damien Comolli është duke punuar për afrimin e Alexander Sorloth nga Atletico Madrid, ndërsa pritet edhe një takim me Real Madrid për të kuptuar situatën e Brahim Diaz. Marokeni shihet si një profil teknik që mund t’i japë më shumë fantazi repartit ofensiv të bardhezinjve.
Ideja e Spalletti është të ndërtojë një sulm më të lëvizshëm, me Kenan Yildiz në të majtë, Francisco Conceição në të djathtë dhe Brahim Diaz në një rol më qendror, pas sulmuesit kryesor.
Sorloth mbetet një nga objektivat më konkretë. Norvegjezi vlerësohet për forcën fizike, prezencën në zonë dhe golat e shënuar në sezonet e fundit në Spanjë. Juventus dëshiron ta mbyllë marrëveshjen përpara nisjes së Botërorit, edhe pse ende ka diferencë mes palëve për çmimin.
Në listën e bardhezinjve është edhe Randal Kolo Muani, i cili pas huazimit te Tottenham është rikthyer te PSG. Sulmuesi francez ka lënë kujtime pozitive në Torino dhe dëshiron sërish rikthimin te Juventus.
Ndërkohë, largimi i Dusan Vlahovic duket gjithnjë e më i mundshëm, pasi sulmuesi serb nuk ka pranuar rinovimin dhe pritet të ndryshojë ambient. Edhe Openda, Milik dhe David kanë të ardhme të pasigurt, ndërsa Juventus kërkon të rindërtojë repartin ofensiv pothuajse nga e para.
