Juventus po përgatit lëvizjet e para të merkatos nën drejtimin e ri të Giovanni Carnevalit, i cili pritet të marrë rolin e CEO-s dhe drejtorit të përgjithshëm të klubit bardhezi.
Një nga hapat e parë të tij do të jetë dërgimi i një ekipi skautësh në Shtetet e Bashkuara gjatë Kupës së Botës, për të ndjekur nga afër lojtarët që mund të bëhen objektiva gjatë verës.
Emri më i rëndësishëm në listën e Juventusit është Brahim Diaz. Mesfushori ofensiv i Real Madrid po zhvillon një Botëror të mirë me Marokun dhe shihet si një profil interesant për repartin sulmues të bardhezinjve.
Juventus po e monitoron situatën e tij, pasi Brahim mund të mos ketë shumë hapësira te Real Madrid. Megjithatë, për momentin lojtari nuk duket i interesuar të largohet nga “Los Blancos”.
Strategjia e Juventusit pritet të jetë e kujdesshme: të tregojë interes, të mbajë kontakte me rrethin e lojtarit dhe të fitojë avantazh nëse në fund të verës hapet mundësia për transferim.
Brahim nuk është objektivi i vetëm që do të ndiqet në Botëror. Klubi synon të rindërtojë edhe sektorin e skautimit, duke u rikthyer te një strukturë më tradicionale dhe më e fortë në kërkimin e talenteve.
Në këtë kuadër, pritet rikthimi i Matteo Tognozzit në Torino, ndërsa mund të bashkohet edhe Davide Cangini, një emër i besuar i Carnevalit nga koha te Sassuolo.
