Juventus zhvilloi një nga paraqitjet më bindëse të sezonit, duke mposhtur Napoli me rezultatin 3-0 në shtëpi, në një mbrëmje perfekte në Allianz Stadium. Bardhezinjtë siguruan tre pikë shumë të rëndësishme falë golit të David në pjesën e parë dhe realizimeve të Yildiz dhe Kostic në fraksionin e dytë të lojës.
Që në minutat e para, Juventusi e mori kontrollin e ndeshjes, duke ushtruar presion të lartë dhe duke mos i lënë hapësira Napolit për të ndërtuar lojën. Rasti i parë erdhi herët, ndërsa pak minuta më vonë Thuram goditi shtyllën, duke paralajmëruar golin që po afrohej. Epërsia u konkretizua në minutën e 22-të, kur Locatelli shërbeu me finesë për David, i cili finalizoi saktë për 1-0.
Napoli tentoi të reagojë dhe pati më shumë zotërim topi drejt fundit të pjesës së parë, por pa rrezikuar realisht portën e bardhezinjve, të cilët u treguan të organizuar dhe të rrezikshëm në kundërsulme. Pjesa e parë u mbyll me avantazhin minimal të Juventusit.
Në pjesën e dytë, miqtë patën një moment presioni në mesin e lojës, por mbrojtja e Juventusit qëndroi solide. Momentet vendimtare erdhën në minutën e 77-të, kur një top i ndërprerë në mesfushë u shndërrua në asist për Yildiz, i cili përballë portierit nuk gaboi dhe dyfishoi shifrat.
Goditja përfundimtare erdhi dhjetë minuta më pas: Kostic realizoi nga distanca me të majtën, duke vulosur fitoren 3-0 dhe duke i dhënë fund çdo dyshimi për rezultatin.
Një sukses i pastër dhe plotësisht i merituar për Juventusin, që konfirmon formën e mirë dhe ambiciet e bardhezinjve, ndërsa për Napolin kjo mbetet një humbje për t’u reflektuar, pas një ndeshjeje ku nuk arriti asnjëherë të imponohej realisht.
