Julián Alvarez ka lëshuar një deklaratë të fortë pas fitores së Argjentinës ndaj Austrisë në Botëror, duke bërë të qartë se kërkon largimin nga Atlético Madrid.
Sulmuesi argjentinas foli për një televizion argjentinas pas ndeshjes dhe nuk u fsheh për të ardhmen e tij.
“Më e mira për të gjithë është një transferim. Dua të përmbush ëndrrën time”, u shpreh Alvarez.
Lojtari i Atlético Madrid pranoi se momenti nuk ishte ideal për të folur për merkato, por theksoi se dëshiron të jetë i sinqertë.
“Nuk është momenti për të folur për këtë, por nuk mund të fshihem. Përpiqem të jem një person i ndershëm. Kam folur me njerëzit te Atlético Madrid dhe mendoj se një transferim është më i miri për të gjithë”, shtoi ai.
Alvarez u transferua te Atlético Madrid nga Manchester City në verën e vitit 2024 për 75 milionë euro. Më 9 qershor, Real Madrid bëri një ofertë prej 150 milionë eurosh për të, por ajo u refuzua nga klubi madrilen.
Barcelona është gjithashtu e interesuar për sulmuesin argjentinas, ndërsa Arsenal po ndjek situatën nga Anglia. Megjithatë, opsioni spanjoll duket më tërheqës për lojtarin, pasi ai ka luajtur më parë në Premier League me Manchester City.
Që nga ardhja te Atlético, Alvarez ka luajtur 106 ndeshje, duke shënuar 49 gola dhe duke dhënë 17 asiste. Pavarësisht se ka qenë një lojtar i rëndësishëm për skuadrën, zërat për largimin e tij kanë qarkulluar prej muajsh.
Deklarata e tij në mes të Botërorit nuk është pritur mirë nga Atlético Madrid. Klubi kishte arritur deri tani të kontrollonte situatën dhe interesimin e klubeve të tjera, por dalja publike e vetë lojtarit e ndryshon skenarin.
Në një mbrëmje ku Messi shkroi historinë si golashënuesi më i mirë në historinë e Botërorit, Julián Alvarez, edhe pse nisi nga stoli, mori vëmendjen me deklaratën e bujshme për të ardhmen e tij.
