Sulmuesi argjentinas i Atlético Madrid, Julián Álvarez, ka komentuar zërat që e lidhin me një kalim të mundshëm te Barcelona, duke i ulur rëndësinë spekulimeve për të ardhmen e tij.
Atlético Madrid zhvilloi këtë të hënë ditën mediatike para gjysmëfinales së Champions League ndaj Arsenal. Skuadra e Diego Simeone do të presë londinezët këtë të mërkurë në “Metropolitano”, ndërsa ndeshja e kthimit do të luhet javën e ardhshme në “Emirates Stadium”.
Një nga lojtarët që foli para mediave ishte Julián Álvarez. “La Araña” theksoi se Atlético po zhvillon një sezon shumë të mirë dhe se skuadra është e fokusuar te mundësia për të shkruar historinë e saj.
“Po bëjmë një sezon shumë të mirë. Nëse arrijmë në finale, do të luajmë çdo ndeshje që kishim mundësi të luanim këtë sezon. Jemi të përqendruar te kjo, te ajo që jemi sot si grup, dhe duam të bëjmë historinë tonë”, u shpreh sulmuesi argjentinas.
I pyetur për raportimet që e lidhin me Barcelona për sezonin e ardhshëm, Álvarez u tregua i qetë dhe tha se nuk dëshiron të harxhojë energji me çdo lajm që qarkullon.
“Përpiqem të mos u kushtoj shumë vëmendje gjërave që thuhen, sepse çdo javë dalin lajme të reja dhe informacione nga më të ndryshmet. Nuk dua të harxhoj energji me këtë. Përpiqem të fokusohem te ajo që po bëjmë këtu dhe të jem në formë për të ndihmuar skuadrën të arrijë gjëra të mëdha”, deklaroi Álvarez.
“Nuk mund të dal vazhdimisht të sqaroj apo të përgënjeshtroj çdo gjë që publikohet. Përpiqem të mos u jap shumë rëndësi rrjeteve sociale, sepse shpesh një gjë e vogël kthehet në një grumbull gënjeshtrash. Nuk dua ta harxhoj energjinë time me këtë”, përfundoi ai.
